सूर्योदय वृत्तसेवा|जालना
जालना येथील उप प्रादेशिक परिवहन कार्यालयातील मोटार वाहन निरीक्षक अविनाश पाटील आणि शासकीय चालक भागवत परिसकर हे दोघे दि. 22 नोव्हेंबर रोजी कर्तव्यावर असतांना अग्रवाल चौक, जालना येथे ट्रक क्रमांक एमएच-27 एक्स-1651 चे चालक यांनी उप प्रादेशिक परिवहन कार्यालयाचे वाहन दिसताच हाताने इशारा करून,त्यांना थांबविले. ‘सकाळपासून माझ्या छातीत दुखत असुन, आता चक्कर येत आहे.तसेच घाम येत आहे.कृपया मला जवळच्या दवाखान्यात घेऊन चला’ असे संबंधीत ट्रक चालकाने अधिकाऱ्यांना सांगितले. ट्रकचालकासोबत असलेल्या मुलाने देखील अधिकाऱ्यांना त्याच्या वडिलांना तातडीने दवाखान्यात नेण्याची विनंती केली. चालकाची प्रकृती अत्यंत अस्वस्थ असल्याने, त्याला प्रचंड घाम, चक्कर, श्वासोच्छवासातील अडथळा आणि तीव्र अस्वस्थता अशी लक्षणे जाणवत असल्याचे अधिकाऱ्यांच्या निदर्शनास आले. ट्रक चालकाच्या मुलानेही त्यांच्या वडिलांना हृदयविकार आणि बी.पी.चा त्रास आधीपासून असल्याचे नमूद केले. वैद्यकीय उपचाराची तातडीची आवश्यकता ओळखून अधिकारी व चालक यांनी Good Samaritan मार्गदर्शक सूचना आणि मोटार वाहन कायदा कलम 134A यानुसार आपले मानवी आणि कायदेशीर कर्तव्य बजावत त्यांना त्वरित वैद्यकीय मदत उपलब्ध करून देण्यासाठी रुग्णालयात पोहोचविण्यास मदत केली. ट्रक चालकास त्यांच्या मुलाच्या सहाय्याने शासकीय वाहनातून जिल्हा शासकीय रुग्णालय (घाटी), जालना येथे उपचारासाठी पोहोचविण्यात आले. रुग्णालयात पोहोचेपर्यंत चालक शुद्धीवर होता आणि तो व त्याचा मुलगा एकमेकांशी बोलत होते. त्यानंतर त्यांना शासकीय रुग्णालयात तातडीचे वैद्यकीय उपचार देण्यात आले.
या संपूर्ण कार्यवाहीची नोंद संबंधित पोलिस स्टेशनच्या स्टेशन डायरीमध्ये नियमित पद्धतीने करण्यात आलेली आहे. दरम्यान काही प्रसार माध्यमांमध्ये आणि वृत्तपत्रांमध्ये या घटनेची पूर्ण माहिती शासकीय रुग्णालय अधिकारी, पोलीस अधिकारी किंवा परिवहन कार्यालय यांच्या कोणत्याही पडताळणीशिवाय तथ्यहीन, आधारहीन आणि दिशाभूल करणारी माहिती प्रसारित केली जात आहे. प्रत्यक्षात संबंधित अधिकारी व कर्मचारी यांनी नागरिकाच्या जीविताचे रक्षण करण्याच्या दृष्टीने पूर्णपणे कायदेशीर, तातडीची आणि मानवतावादी हेतूने कार्यवाही केली असून, त्यातून कोणताही अनुचित हेतु, कृत्य अथवा अनियमितता झालेली नाही. या घटनेतील अधिकाऱ्यांची कार्यवाही Good Samaritan Guidelines, भारत सरकार (MoRTH – Ministry of Road Transport and Highways) तसेच मोटार वाहन कायदा कलम 134A यांच्या तरतुदीनुसार केली आहे. Good Samaritan नियमांनुसार रस्त्यावर अपघात किंवा वैद्यकीय आपत्कालीन स्थिती आढळल्यास कोणतीही व्यक्ती किंवा शासकीय अधिकारी तात्काळ मदत करू शकतो आणि अशा मदतीस कायदेशीर संरक्षण दिले जाते. अशा व्यक्तीवर कोणतेही नागरी किंवा फौजदारी दायित्व येत नाही. कोणत्याही अधिकाऱ्याने किंवा नागरिकाने जखमी व्यक्तीला उपचारासाठी रुग्णालयात पोहोचविले असल्यास त्याची चौकशी किंवा छळवणूक करू नये आणि त्याची जबाबदारी निश्चित करता येत नाही, असे स्पष्ट निर्देश केंद्र सरकारने दिले आहेत. मोटार वाहन कायदा कलम 134A मध्येही जखमी व्यक्तीस तात्काळ वैद्यकीय मदत उपलब्ध करून देणे हे कायदेशीर कर्तव्य मानले असून अशा प्रसंगी मदत करणाऱ्या व्यक्तीस संपूर्ण संरक्षण दिले जाते. या तरतुदींनुसार कोणताही संशय किंवा विलंब न करता जीव वाचविण्यास प्राधान्य देणे अपेक्षित आहे. या प्रकरणात अधिकारी व चालक यांनी हीच कायदेशिर, मानवतावादी आणि जीवनरक्षणाची जबाबदारी पूर्णपणे पार पाडलेली आहे. योग्य, वस्तुनिष्ठ आणि सत्य परिस्थिती जनतेपर्यंत पोहोचणे आवश्यक आहे. त्यामुळे प्रसार माध्यमांमध्ये चुकीची माहिती प्रसारित होऊ नये आणि जनतेपुढे अचूक माहिती जावी याकरीता उप प्रादेशिक परिवहन अधिकारी चंद्रमोहन चिंतल यांनी प्रसिध्दीपत्रकाद्वारे हा खुलासा केला आहे.