अतिवृष्टी अनुदान घोटाळा विशेष भाग ७
जालना अतिवृष्टी अनुदान घोटाळा २०२२ मध्ये खासगी एजंट्स आणि दलालांनी शासकीय निधीची लूट करण्यासाठी अवलंबलेल्या अत्यंत गंभीर आणि पद्धतशीर कार्यपद्धतीचा ‘दैनिक सूर्योदय’च्या तपासातून पर्दाफाश झाला आहे.एजंट्सने केवळ बनावट नोंदी केल्या नाहीत,तर शेतीत नसलेल्या व्यक्तींच्या नावावर चक्क बनावट सातबारे तयार केले आणि या कामात त्यांनी स्वतःच्या नातेवाईकांना ‘डमी लाभार्थी’ बनवल्याचे उघड झाले आहे.
एजंट्सची दुहेरी फसवणूक:बनावट सातबारा आणि नोटीसचा पुरावा
‘दैनिक सूर्योदय’च्या हाती लागलेल्या तहसील कार्यालयाच्या नोटीसने एजंट्सनी केलेल्या फसवणुकीवर शिक्कामोर्तब केले आहे.एका बाजूला नोटीसमध्ये ‘क्षेत्र उपलब्ध नसतानाही अनुदान उचल’ केल्याचे स्पष्ट नमूद आहे,तर दुसरीकडे मिळालेल्या माहितीनुसार,या एजंट्सनी
बनावट सातबारे
शेतीत नसणाऱ्या व्यक्तींच्या नावावर ‘फोटोशॉप’ किंवा अन्य मार्गांनी बनावट सातबारे तयार केले. हे बनावट सातबारेच अनुदानासाठी आवश्यक कागदपत्रे म्हणून वापरण्यात आले.तपासामध्ये तब्बल १०० बनावट सातबारे आढळून आले आहेत.
नातेवाईकांचा वापर
अनेक खासगी एजंट्स आणि त्यांना मदत करणाऱ्या तलाठी व ग्रामसेवकांनी स्वतःचे नातेवाईक किंवा अत्यंत जवळच्या व्यक्तींना लाभार्थी म्हणून उभे केले.त्यांच्या नावावर अनुदान मंजूर करून ते पैसे परस्पर काढून घेण्यात आले.अशा प्रकारे,अनुदानाच्या रकमेतील मोठा वाटा ‘एजंट्स’ आणि ‘कर्मचारी’ यांच्यामध्येच वाटला गेला.
२५ कोटींच्या घोटाळ्यात एजंट्सच मुख्य सूत्रधार
जालना जिल्ह्यातील अतिवृष्टी नुकसान भरपाईच्या सुमारे २५ कोटी रुपयांच्या घोटाळ्यात खासगी एजंट्सची भूमिका अत्यंत निर्णायक असल्याचे आर्थिक गुन्हे शाखेने (EOW) स्पष्ट केले आहे.या एजंट्सच्या मदतीशिवाय,महसूल कर्मचाऱ्यांना शेकडो बनावट लाभार्थी उभे करणे शक्यच नव्हते.एजंट्सनी अनुदानातून काढलेल्या पैशांचा वापर मालमत्ता खरेदीसाठी केला असावा, या संशयावरून आता त्यांच्या मालमत्ता आणि बँक खात्यांची कसून चौकशी सुरू आहे.
तहसील कार्यालयाच्या नोटीसमध्ये नमूद केल्याप्रमाणे,”सदर मुदतीत आपण रक्कम शासनाखाती भरणा न केल्यास फौजदारी गुन्हा दाखल करण्यात येईल”,या स्पष्ट इशाऱ्यामुळे आता अनेक खासगी एजंट्सना अटक होण्याची भीती वाटत आहे.फरार महसूल कर्मचाऱ्यांसह या एजंट्सना जेरबंद करण्यासाठी पोलिसांकडून तांत्रिक तपासणीचा वेग वाढवण्यात आला असून,लवकरच यातील मुख्य सूत्रधारांच्या मुसक्या आवळल्या जातील,अशी अपेक्षा आहे.
पुढील भाग लवकरच