‘सिस्टीम’मधील अधिकाऱ्याला अटक;आता बनावट लाभार्थी व एजंट्सच्या संपूर्ण साखळीवर करवाई करण्याची गरज
जालना जिल्ह्यातील अंबड व घनसावंगी तालुक्यात झालेल्या नैसर्गिक आपत्तीमुळे शेतकऱ्यांच्या पिकांचे मोठे नुकसान झाले होते. शासनाने वेळोवेळी 04 जी आर काढून बाधित शेतकऱ्यांना अनुदान जाहीर केले होते. या अनुदानाच्या वाटपामध्ये मोठा घोटाळा झाल्याचे उघडकीस आले आहे. अंबड व घनसावंगी तालुक्यात याद्या अपलोड करण्याचे काम करणारे संबंधित अधिकारी व कर्मचारी यांनी मोठ्या प्रमाणावर बोगस (ज्यांच्या नावावर शेती नाही) नावे यादीत अपलोड करून त्यांच्या नावावर आलेल्या शासनाच्या अनुदानाची रक्कम परस्पर परत घेतल्या संबंधीच्या तक्रारी प्राप्त झाल्या होत्या.गुन्ह्यात यापूर्वी ७ (सात) आरोपींना अटक करण्यात आलेली आहे.गुन्ह्यात इतर आरोपींचा सहभाग निष्पन्न करून सखोल तपास सुरू असताना, घनसावंगी तालुक्यातील राजणीवाडी,भुतेगाव,कृष्णानगर या गावांमध्ये ई-पीक पाहणी पंचनामे करून पिकनिहाय बाधित शेतकऱ्यांची यादी अपलोड करण्याचे काम केलेले सहाय्यक कृषी अधिकारी केशव गंगाधर कचकलवाड यांचा गुन्ह्यात सक्रिय सहभाग दिसून आला. त्यांचा शोध घेत असताना आज रोजी सदर आरोपी हा इंदेवाडी येथील त्यांच्या राहत्या घरी आल्याची माहिती मिळताच आरोपीचा शोध घेण्यात आला. आरोपी केशव गंगाधर कचकलवाड,व्यवसाय कृषी सहाय्यक त्यांच्या राहत्या घरी इंदेवाडी येथे मिळून आल्याने त्यास गुन्ह्यात अटक करण्यात आली आहे.