सूर्योदय वृत्तसेवा|जालना
जालना जिल्ह्यातील अंबड व घनसावंगी तालुक्यात झालेल्या नैसर्गिक आपत्तीमुळे शेतकऱ्यांच्या पिकांचे मोठ्या प्रमाणावर नुकसान झाले होते. त्यामध्ये शासनाने वेळोवेळी ०४ जी आर काढुन बाधित शेतकऱ्यांना अनुदान जाहीर केले होते. त्यामध्ये अंबड व घनसावंगी तालुक्यात यादया अपलोडींगचे काम काज करणारे संबधत अधिकारी कर्मचारी यांनी मोठ्या प्रमाणावर बोगस (शेती नावावर नसलेले) नावे यादया मध्ये अपलोड करुन त्यांचे नावे आलेल्या शासनाचे अनुदानाची रक्कम त्यांचे कडुन परस्पर परत घेतल्या संबंधी तक्रारी प्राप्त झाल्या होत्या त्यामुळे तत्कालीन जिल्हाधिकारी यांनी सदर प्रकरणात सत्यता पडताळणी साठी चौकशी समीती गठीत केली होती.
चौकशी समीतीने चौकशी करुन एकुण २४० गावामध्ये २४,९०,७७,८११/- इतक्या शासकीय रकमेचा अपहार झाला असल्या बाबत अहवाल दिल्यानंतर सदर प्रकरणात पोलीस स्टेशन अंबड येथे गुन्हा रजि. क्र. 453/2025 कलम 316(4), 316(5), 318(4), 324(5), 336(3), 338, 340(2), 339, 238, 3(5) BNS सह कलम 52, 53 आपत्ती व्यवस्थापन कायदा 2005 अन्वये गुन्हा दाखल आहे. गुन्हयाचा तपास मा. पोलीस अधिक्षक साहेब यांचे आदेशान्वये आर्थिक गुन्हे शाखा जालना करीत आहे.
सदर गुन्हयात १० आरोपीना आर्थिक गुन्हे शाखेकडून अटक करण्यात आली आहे.सदर गुन्हयात एकुण २८ आरोपी विरुध्द गुन्हा दाखल करण्यात आलेला आहे.फिर्यादी मधील आरोपीना मदत करणारे खाजगी एंजट आणि तलाठयांचे सहाय्यक कोतवाल हे सुध्दा तपासात दोषी आढळुन आले असल्याने त्यांचे सहभाग निष्पन्न करुन त्यांचे सहभागाप्रमाणे व मिळालेल्या पुराव्याच्या आधारे आता कोतवाल व खाजगी एंजट यांना सुध्दा गुन्हयात अटक करण्याचे काम आर्थिक गुन्हे शाखेकडून करण्यात येत आहे. त्यामुळे आरोपीची संख्या वाढत आहे.
गुन्हयातील फरार आरोपींचा शोध घेत असताना दिनांक ६ डिसेंबर रोजी गुन्हयातील तलाठी आरोपी नामे किरण रविंद्र जाधव वय ३६ वर्ष व्यवसाय नौकरी तलाठी सजा पानेगाव तहसील अंबड रा.देऊळगाव राजा ता. जि. बुलढाणा ह.मु. अंबड ता.अंबड जि. जालना.हा छत्रपती संभाजीनगर येथे मिळुन आल्याने त्यास अटक करण्यात आली.आरोपीकडे केलेल्या चौकशीत आणी यापुर्वी झालेल्या तपासा दरम्यान निष्पन्न झालेल्या पुराव्या आधारे तलाठी किरण जाधव याचा सहाय्यक अशोक रामभाऊ शिंदे वय ५२ वर्षे (कोतवाल) यास दिनांक १६ डिसेंबर रोजी रात्री उशीराने अटक करण्यात आली आहे.आज रोजी दोन्ही आरोपीताना मा.अंबड न्यायालयात हजर केले असता न्यायालयाने दोन्ही आरोपीताना दिनांक १० डिंसेबर पावेतो पिसीआर मंजुर केली आहे.