सूर्योदय वृत्तसेवा|अंबड
जालना जिल्हा परिषदेचे मुख्य कार्यकारी अधिकारी (सीईओ) अंबड पंचायत समितीला भेट देणार असल्याची माहिती मिळताच, कार्यालयातील नेहमीची बेशिस्त व गोंधळ एका रात्रीत संपुष्टात आला. जी साफसफाईची कामे आणि व्यवस्थेतील सुधारणा अनेक महिने प्रलंबित होत्या, त्या कामांनी सीईओंच्या भेटीच्या निमित्ताने अचानक वेग घेतला. परिणामी, नेहमी अस्वच्छ दिसणारे पंचायत समिती कार्यालय अक्षरशः चकाचक झाले.
या भेटीच्या धास्तीने कार्यालयातील अधिकारी व कर्मचाऱ्यांमध्ये शिस्त आणण्याचे प्रयत्न तातडीने सुरू झाले. अनेकदा ओळखपत्र (आयडी कार्ड) न घालता बिनधास्त काम करणारे सर्व अधिकारी व कर्मचारी आज गळ्यात ओळखपत्र घालून कामावर हजर झाले होते. सीईओंच्या पाहणीत कोणतीही त्रुटी राहू नये, यासाठी कर्मचाऱ्यांनी स्वयंस्फूर्तीने शिस्त पाळण्यास सुरुवात केली.
सर्वात मोठी सुधारणा कार्यालयाच्या पार्किंग व्यवस्थेमध्ये दिसून आली.नेहमी बेशिस्तपणे वाहने उभी केल्यामुळे गोंधळाचे चित्र असणारे कार्यालय आज पूर्णपणे शिस्तबद्ध दिसत होते.कर्मचाऱ्यांच्या व नागरिकांच्या वाहनांसाठी योग्य जागा निश्चित करून पार्किंगची व्यवस्था तात्काळ सुधारण्यात आली. एकंदरीत,वरिष्ठ अधिकाऱ्यांच्या एका भेटीच्या बातमीने पंचायत समितीच्या दैनंदिन कामकाजातील गोंधळ दूर होऊन कार्यालयाला तात्पुरती का होईना,पण शिस्त लागल्याचे चित्र दिसून आले.अधिकाऱ्यांच्या धास्तीमुळे मिळालेली ही शिस्त यापुढेही कायम राहिल्यास नागरिकांची कामे अधिक सुरळीत होतील, अशी अपेक्षा व्यक्त होत आहे.या प्रकारची शिस्त केवळ वरिष्ठ अधिकाऱ्यांच्या भेटीपुरती न ठेवता ती कायमस्वरूपी ठेवण्यासाठी काय उपाययोजना करणे आवश्यक आहे?