सूर्योदय वृत्तसेवा
डॉ. स्नेहल घुगे यांनी एका सनसनाटी व्हिडिओद्वारे बदनापूरचे भाजप आमदार नारायण कुचे यांच्यावर अत्यंत गंभीर आरोप केले आहेत.डॉ. घुगे यांनी त्यांच्या सासरच्या लोकांकडून होत असलेल्या छळाबद्दल आवाज उठवताना,त्यांच्या नणंदेने आमदार कुचे यांचे नाव वापरून धमक्या दिल्याचा दावा केला आहे.
डॉ.स्नेहल घुगे यांच्या म्हणण्यानुसार,त्यांची नणंद योगिता संजय सानप ही आमदार नारायण कुचे यांची कार्यकर्ती आहे.सासरचे लोक त्यांना वारंवार धमकावत आहेत, ज्यात नणंद योगिता सानप ही आमदार कुचे यांचे नाव घेत असते. धमक्या देताना, “आम्ही कुचे साहेबांचे नाव सांगितले आणि पाच-दहा लाख रुपये दिले, तर तू कोणतीही केस केलीस तरी आम्ही बाहेर पडू,” असे स्पष्टपणे सांगितले जात असल्याचा आरोप डॉ. घुगे यांनी केला आहे.
डॉ.घुगे यांनी या व्हिडिओमध्ये, आपल्या जीविताला धोका असल्याची भीती व्यक्त केली आहे. त्यांनी म्हटले आहे की, गौरी पालवे यांच्याप्रमाणेच माझाही खून आत्महत्या दाखवण्याचा प्रयत्न होऊ शकतो आणि असे काही झाल्यास माझी सासरची मंडळी जबाबदार असतील. राजकीय कनेक्शनमुळे पोलीस प्रशासनही मदत करत नसल्याचा गंभीर आरोप त्यांनी केला आहे.
आमदार कुचे यांचा आरोपांवर स्पष्ट इन्कार:
दुसरीकडे, आमदार नारायण कुचे यांनी डॉ. स्नेहल घुगे यांनी केलेले सर्व आरोप तातडीने फेटाळून लावले आहेत. या प्रकरणावर प्रतिक्रिया देताना आमदार कुचे यांनी स्पष्ट केले आहे की, “मी संबंधित महिलेला आणि तिच्या पतीला ओळखत नाही.”
डॉ. स्नेहल घुगे यांनी यापूर्वी त्यांच्या पती रवींद्र महादेव घुगे यांच्यावर मारहाण करून पळून गेल्याचा आणि दुसऱ्या लग्नाची तयारी करत असल्याचा आरोप केला आहे, तर दीर श्रीराम घुगे हाच दुसरे लग्न लावण्यासाठी सक्रिय असल्याचा दावा केला आहे. या वादात आता आमदार नारायण कुचे यांचे नाव आल्याने हे प्रकरण अधिक चिघळण्याची शक्यता आहे.